الوقت مهم لانقاذ المخ                    

يعنى ايه جلطة المخ او السكتة الدماغية

جلطه في المخ كما تحدثنا د / ماريا الفى اخصائى امراض المخ و الاعصاب بمستشفى الملاك  يعني وصول الدم لمكان معين حصل فيه مشكلة و بالتالي النسيج بتاع الجزء المعين ده ابتدا يتغير وما يبقاش نسيج طبيعي حي وبيشتغل كويس .

ايه هى اسباب جلطة المخ ؟

في اسباب كثيره قوي من اهمها مشاكل زي الضغط والسكر والسن الكبير والدهون العاليه في الدم و ترسب الدهون على الشرايين او المعروف بتصلب الشرايين وبعض امراض تجلط الدم وطبعا بعض امراض القلب

اعمل ايه لو حد معايا حصل معاه كده ؟

غلط جدا اني اجري ادي العيان اسبرين او ادويه سيوله او حقنه تحت الجلد بتاعه السيوله من غير ما اروح اوديه طوارئ يعمل اشعه على المخ تبين ايه المشكلة .

وده لأن اعراض الجلطه زي اعراض النزيف في المخ بالضبط اللي يقدر يحددها هو الطبيب بالكشف و بالاشعه

كمان في بعض التدخلات الطبيه اللي ممكن تتعمل للمريض بدري قوي علشان تحسن حالته لو انا اديته جرعات كثيره من ادويه السيوله ممكن يؤخر علاجه بطريقه معينه او يمنع عنه الفرصه ان هو ياخذ علاج معين ممكن يفيد قوي .

اهم حاجة لازم   اجرى بسرعة اوديه حاجه اسمها وحدات الجلطه او وحدات السكته الدماغيه ودى بتبقى موجوده على مستوى الجمهوريه الحمد لله الوحدات ابتدت تتوفر في مستشفيات كثير من اهمها مستشفى القصر العيني القديم والدمرداش وعين شمس التخصصي ومستشفى المطريه المستشفيات دي مجهزه بحاجه اسمها وحدات السكته الدماغيه وحدات السكته الدماغيه دي فيها العلاج بتاع الجلطات اللي بيتاخذ اول اربع ساعات من الجلطه

العلاج ده الناس بتقول عليه علاج بيدوب الجلطه او اي ان كان اسمه الشائع ولكن مش كل مريض جلطه مخ يقدر ياخد العلاج ده

العلاج ده بيتاخذ لو لحقنا العيان في اول اربع ساعات بالاضافه الى حاجات معينه في تاريخ العيان المرضى و في التاريخ الطبي و في الاشاعات بتاعته

الهدف من الكلام ان احنا نلحق العيان اول ما يبان عليه اعراض ما تجيش بقي تشربه ميه بسكر او ادي له اي دواء، لا اول ما شفت الاعراض بتاخذه وبتجري على اقرب مكان في وحده سكته دماغيه وهم هناك بيحددوا حالة العيان ،يقدر يستفيد من العلاج الاولي للجلطه ولا لأ وساعتها يبتدي ياخذ علاجات اخرى طريقه معينه يبقى انا كده انقذت العيان ووديته بدري

عشان احنا بنقول مثل شهير قوي هو الوقت في الحالات دي مهم لانقاذ المخ

 Time is brain